أنا كويتي …بس يو أر نوت

flag

صج ان طافت فترة طويلة وانا مو كاتب شي…بس مدام شهر فبراير من المناسبات الجميلة لنا ككويتين…قلت ابي اقول الي بقلبي…سامحوني على البدليات الي راح تكون موجودة اكيد

المهم…صارلنا فتره و احنا انخلص من سالفة وندش بسالفة ثانية…وشكلها محنا مخلصين …بس شي لازم نستوعبه ان كل كويتي صار يشوف الثاني مو كويتي..من الكلام الجميل الي نسمعه كل يوم

الي مو عاجبه يطلع بره الديرة

متي متجنس

الي يقاطع / يشارك خان الوطن

يالفداوي

يالمزدوج

ولائك حق اي دولة /حزب/فلان

الزبدة الكويتين كلهم صاروا خونه ….الكل صار يشوف الطرف الثاني عميل و غير كويتي

حب الوطن مو الكتاب الأسود الي ما تشوفه الا وقت الانتخبات بس، ولا شعار تكتبه بالتويتر…ولا صورة تحطها بالنستاغرام

حب الوطن انك تدافع عن الديرة..تبدع بمجال يوصل اسم الكويت للعالمية..انك توقف ضد الغلط والفساد من غير مصالح شخصية

 مشكلتنا ان احنا ما نحترم الراي…اول ما اقول شي ضد فكرك..صرت فاسد و راعي مشاكل و و و و ما نخلص

وشوف الكلام الجميل لمن توقف في موقف من الدول المجاورة…تصير فلول..ارهابي..طائفي…يعني كل كويتي له نصيب من هل تشخيص الي على كيفهم…التخوين شي كبير..واذا انت تخون اي احد لو شنو فكره ومن غير دليل…الكل له حق ان يخونك انت من غير ما تتكلم.

———————-

وبعيد عن السياسة…نتكلم عن الجانب الاجتماعي

“هذا مو من عاداتنا وتقليدنا واهل الكويت مالهم بهالسوالف”

كل ما واحد تكلم عن الشعب الكويتي. الشعب الكويتي ١،٤ مليون شخص. لايكون سألت كل واحد فيهم عن رايك وكلهم مع رايك؟ انا واخوي ما نتفق …تبي ١،٤ مليون واحد يتفق؟  يعني عبر عن رايك كيفك…بس لا تجمع الشعب الكويتي مع رايك

وهالفتره صار فيه جملة متداوله واهي

“ادعم المشاريع الصغيرة والمنتج الكويت”

انا ادعم المنتج الكويتي ومشروعات الصغيرة لو شفت شي زين منهم ويستاهل. حتى لو كان كب كيك. بس ان السالفه تصير بوق و اسعار خيال. لا اوقف اهني. لازم المشاريع الصغيرة تتعلم من التجارة. بوق افكار واسعار مالها شغل بسعر عمل المنتج شي اساسي ان يكون فيه وعي وتعليم. business 101.

والمنتج الكويتي…لمن تفتح محل بإسم محل عالمي من غير ترخيص من الشركة…ولا تبيع سوالف تقليد…لا هذا مو منتج كويتي

فيه امثله كثيرة من المشاريع الصغيرة  و منتجات الكويتية الي افتخر انهم من ديرتي. ولا ننسي الأعمال الخيرية  وانسانية من غير دعم ولا مساعدة ولا ارباح. وهذا يفتخر فيه اي كويتي…الا لو كان ضد فكرك

————————

نعم عندنا مشاكل…..ولكن المشاكل ما تنحل اذا كل واحد شاف الي بصالحه بس….الكويت تتكون من فئات….نقدر نتناقش بين اختلافات في الفكر سياسياً او اجتماعياً. من غير ما نشكك بالشخوص وسب ولعن و ذبح والحين وصلت للتكفير

بس وصلنا مرحلة لازم نحترم بعض ونحل مشاكلنا.

الله يحمي الكويت واهلها

Related Posts Plugin for WordPress, Blogger...

Leave a Reply